PUKmedia /Piştî ku konsulê Amerîkayê yê li Kerkûkê Howard Keegan di hevdîtineke bi rojnameya Asoyê re, li ser bajarê Kerkûkê hin nêrînên xwe anîbûn ser zima, cîgirê serokê parlamentoya Kurdistanê Kemal Kerkûkî li hemberî nêrîn û axiftinên wî, bi nivîsekê bersiva wî da. Tekista bersiva Kerkûkî wiha ye: Konsolê Amerîkarê yê li Kerkûkê Howard Keegan di hevdîtineke bi rojnameya Asoyê re li ser hin mijarên girêdayî bajarê Kerkûkê axivîbû, ku pir hestiyar û girîng in û nabe li hemberî wê bêdeng bimînin û tu helwestekê nîşnan nedin, belkû divê axivtinên wî bi hûrî bên bersivdayîn. Bi nêrîna Keegan ’daxwaza civata parêzgeha Kerkûkê ya vegerîna parêzgeha Kerkûkê bo ser Herêma Kurdistanê, daxwazeke rewa nebû' û dibêje ’çimkî ereb û tirkmen beşdarî wê daxwazê nebûbûn'. Berî her tiştî konsolosek ku li cihekî hestiyar yê wekû Iraqê û di Iraqê de jî cihekê wekû Kerkûkê, nûnertiya dewleteke wekû Amerîkayê dike, pêwîst e pir şiyar, dûrbîn û bêalî be û xwe nexwe nav mêzana tu aliyekî. Divê herî kêm bizane civata parêzgehê ji çend kesan pêk tê, endamên wê ser bi kîjan lîsteyên ne û ew lîste jî ji bo pêşxistina bajêr û çareserkirina arîşeyn çawa û bi çi awayekî kar dike. Ev îşên destpêkê ê wê ye û divê baş bizanibe û agahdarî van tiştan be. Diviyabû berî van axaftinan, birêz Howard Keegan lêkolîneke baş li ser civata parêzgeha Kerkûkê kiraba û zanîba Lîsteya Biratiya Kerkûkê ji çi û bi çi awayekî pêk hatiye.Diyar e bi nêrîna wî her tirkmen an jî arebek li dijî kurdan nebe, bi ereb û tirkmen nayê jiamrtin. Ev nêrîna Keegan di cih de nîne, çimkî Lîsteya Biratiya Kerkûkê ji kurd, tirkmen, ereb, kildan û aşûriayan pêk tê. Herweha ji ber wê yekê rast nîne, ku zanyariyên nerast li ser rûpelên rojnameyan bê belavkirin û rastiyan ji xelkê re bi xeletî bidin fêmkirin û bibe sedema ziyangihandinê bi wan aliyên demokratîxwez ku şerê jenosîdê li dijî wan hate kirin. Birêz Keegan di beşeke din a wê hevdîtinê de dibêje : “Ez dikarim bêjim her du alî (hikûmeta Herêm û hikûmeta navendî) bandoreke wiha çêkirine ku aliyên nav parêzgeha Kerkûkê diyalog û gotûbêjan nekin.“ Ev yek bala mirov dikişîne, çimkî kesekî wekû wî, ev demeke li Kerkûkê ye. Ji nêz ve haydarî rewşa Civata Parêzgeha Kerkûkê ye ku piraniya endamên civatê ser bi Lîsteya Biyatiyê ne û her tim dazwaz kirine ku bi hev re kar bikin û Herêma Kurdistanê jî ji destpêkê ve dirûşmeya aştiya giştî bilind kiriye û di çendîn kongre û konferansan de kar ji bo lihevnêzîkbûnê kiriye û lîsteya Biratiyê jî ku Herêma Kurdistanê piştgiriya wê dike, tenê ji neteweya kurd pêk nehatiye, belku ji hemû pêkhateyên sereke ên wî bajarî pê tê. Bîrêz Keegan, tu piştgiriyê didî madeya 24-ê û wê madeyê bi destkeftekê bi nav dikî, amajeyê bi wê yekê dikî ku li gor madeya 24-ê divê hemû aliyek bihevre rûnin û li ser arîşeya navbera wan a sererke, biaxivin, bo ku bigêhijin çareseriyekê. Lê belê ev yek ji bîra te çû ku ew made (madeya 24-ê) bû sedema şehîdbûna 29 welatiyan û birîndarbûna zêdetirî 200 welatiyên din. Te di bersivekê de gotiya, Civata Kerkûkê destûrî nîne. Ecêb e! Li welatekî hilbijartin bê pêkanîn û Neteweyên Yekbûyî hilbijartinê bipejirînin, balyoz û serokkomarê Amerîkayê, wezareta derve ya Amerîkayê wê hilbijartinê bipejirînin û pîrozbahiyê lê bikin, lê belê niha dîplomatkarekî fermî yê Amerîkayê li Kerkûkê wê civatê bi neresmî bîne ziman û bi nerewa bizane. Bi vê helwestê kar dê ber bi xirabiyê ve biçe û dê ajawe çê bibin û pêkhate dê li dijî hev bên rakirin. Birêz, Civata Kerkûkê şer'iyeta xwe heye û li gor destûra Iraqê kar dike. Eger tu dibînî endamên civatê zêdetir, kurd in, ev wê yekê digihîne ku piraniya pêkhateyên bajêr kurd in û kurd jî li gor yasayê di berjewendiya hemû pêkhateyan de kar dike. Tu di beşeke din a hevdîtinê de dibêjî “Li Kerkûkê ereb û tikmen jî hene“. Birêz Keegan, li Kerkûkê tenê ereb û tirkmen nînin, belku li wî bajarî kurd, ereb, tirkmen, kildan, aşurî û ermenî jî hene. Piraniya akinciyên Kerkûkê, ji hemû pêkhateyên wê ku ji aliyê rejîma Beasê ve zilin li wan hatiye kirin, dixwazin carek din wekû mirov bijîn û di pêşiya yasa û destûrê de yek bin û xizmeta bajêr û welatê xwe bikin û dixwazin tu kes bi çavekî kêm li aliyê din temaşe neke. Di bersiveke din de hun dibêjin “Bi nêrîna me arîşeya Kerkûkê qet bi yasayê nayê çareserkirin“ Rêzdar, gelo dê bi çi bê çarserkirin? Ez nizanim, hun dizanin ji bo çareserkirina arîşeya Kerkûkê madeyeke destûrî hatiye danîn, ew jî madeya 140-ê ye û ev demek e lîjneyek hatiye pêkanîn ji bo bicîhanîna wê madeyê? Niha tu dibêjin arîşeya Kerkûkê derveyî yasayê nebe, nayê çareserkirin! Ji bo agahdariya we, kevnebalyozê Amerîkayê yê li Iraqê John Nigroponte piştevaniya xwe ji bo madeya 58-ê nîşan dabû ku ew made, madeya 140-ê ya niha ye, paşê Zalmay Xelîlzad jî di çendîn merasîm û munasebetan de piştevaniya xwe ji bo wê madeyê dubare kiriye. Niha jî Crocker, hin berpirsên din û Pentagon piştevaniyê li wê madeyê dikin, lê belê hun wiha tînin zimên ku arîşe bi yasayî nayê çareserkirin. Em daxwaz ji aliyên berpirs ên Amerîkayê dikin ku bersiva me bidin, ku gelo ev raya fermî ya Amerîkayê ye, yan raya taybet a wî rêzdarî ye? Çimkî helwestên vî awayî ajaweyê çê dikin û divê bê gotin, bicîhneanîna madeya 140-ê aramiya deverê dişêwîne. Tu di bersiveke din de dibêjî: “Ez tê nagihim hun çaverêyî çi reaksiyeneka Amerîkayê? Xwepêşandana ku hate kirin ji aliyê partiyên siyasî ve bû, ne ji aliyê welatiyan bû, xwepêşandan raya xelkê nebû, lê belê raya partiyên siyasî bû“! Pir ecêb e, ji wê jî ecêbtir ew e ku bi sedan hezar kesên xwepêşandêr ji bo bidestxistina mafên xwe û pêbendbûn bi destûrê ve, birijin ser cade û kolananên kurkûkê û rêzdar kondolê Amerîkayê ku li cîhanê bi welatekî demokrasî hatiye nasîn, bibêje ’ev raya xelkê nîne, raya partiyen e'. Bi ya we, ew xwepêşandan, di eslê xwe de referendomeke giştgîr nebû? Gelo di hilbijartina Amerîkayê a serokkomarî, kongres û şaredariyê de, partî, xelkê xwe amade nakin? Em li benda wê yekê bûn ku ji we fêrî demokrasiyê bibin, ne ku sivikatîkirinê bi xelkê bikin. Niha em ji we û hemû dinyayê re dibêjin, ji bo çareserkirina arîşeya Kerkûk û hemû cihên nakokbar, madeyeke destûrî heye, ew jî madeya 140-ê ye. Li gor wê madeyê arîşe dê bên çareserkirin û aramiya deverê girêdayî wê yekê ye ku arîşe bi dadperwerî bên çareserkirin û bi riyeke yasayî rêz li îradeya xelkê bajêr bê girtin û madeya 140-ê jî bi temamî bê bicîhanîn