Köln – Rojnama navnetewî Le Monde Diplomatique bi kurdî derket. Le Monde Diplomatique kurdî; bi kurmancî li Ewrûpa, bi soranî jî li Başûrê Kurdistanê dest bi weşanê kir. Hejmara yekem ya Le Monde Diplomatique kurdî roja çarşemê daket firoşgehan. Le Monde Diplomatique kurdî wê li hemû welatên Ewrûpa û li Başûrê Kurdistanê bê belavkirin.
Di hejmara yekem ya Le Monde Diplomatique kurdî de nivîsên edîtorê giştî yê rojnamê Faysal Dağlı, edîtora soranî Nazand Begikhanî, Dr. Nebî Kesen, Sharo Brahîm, Doğan Akhanlı, Prof. Lazarov, Serge Helimi û gelek nivîsên ku ji editoriya fransî hatine vergerandin cîh digrin.
Edîtorê giştî Le Monde Diplomatique kurdî nivîskar/rojnamevan Faysal Dağlı ye. Beşa soranî ji alî rojnamevan Nazand Begikhanî ve tê birêvebirin. Şêwirmendiya weşanê ya Le Monde Diplomatique kurdî ji alî Berîvan Aymaz û Ako Mihemed ve, asîstaniya weşanê jî ji alî Selam Sadi û Semira Bolat ve tê kirin. Rêvebirên hunerî ya rojnamê Mehmet Nazmi Demir û Bextiyar Mistefa ne.
Beşek ji nivîsên Le Monde Diplomatique ji alî edîtoriya kurdî tê amadekirin, beşeke jî ji versiyona fransî tê vergerandin. Di hejmara yekem ya kurmancî de; İbrahim Seydo Aydoğan, Aynur Bozkurt, Cemil Denli, Salih Kevirbirî, Emrah Kocahal, Alîxan Serhedî, Lokman Turgut û Ergîn Upengin, di beşa soranî de jî Muhsîn Ahmed, Amir Ahmad, Herdî Baban, Kawa Dastoorrah, Mesûd Diryaz, Ahmedê Mela û Mansour Sedghî wek werger cîh digrin.
Le Monde Diplomatique kurdî li Ewrûpa ji alî Rûdaw Media GmbH û li Kurdistanê jî ji alî Rûdaw Media Company ve te weşandin. Heftenama Rûdaw jî piştevaniya Le Monde Diplomatique kurdî dike.
Le Monde Diplomatique kurdî li ser înternetê jî weşanê dike. Navnîşana Le Monde Diplomatique kurdî wiha ye: http://www.lemondediplo-kurdi.com
Di malpera Le Monde Diplomatique kurdî de di derbarê şertên abonetiya rojnamê de agahiyên berfireh hatiye dayîn.
46 welat, 26 ziman, 2.5 milyon tîraj
Faysal Dağlı, Edîtorê Giştî yê Le Monde Diplomatique kurdî bi munasebeta derketina rojnamê daxuyaniyekî belavkir û wiha got: ’'İro li cîhanê di asta navnetewî de behsa weşaneke bi tesîr bê kirin, bê guman Le Monde Diplomatique tê rojevê. Xwînerên Le Monde Diplomatique zêdetir; siyasetmedar, dîplomat, bazirganên navnetewî, akademîsyen, zanistên civakî û kesên entelektuel in.''
Li gor agahiyên Dağlı, Le Monde Diplomatique li 46 welatan bi 26 zimanan derdikeve û tîraja wê nêzî 2 milyon û nîv e.
Edîtorê rojnamê Faysal Dağlı wiha got; ’'Le Monde Diplomatique kurdî yekem projeya navnetewî ye ku medya kurdî daxil dibe. Serpêhatiya rojnamegeriya kurdî ku sed û çar sal berê destpêkir îro gihîştiye mustewa projeyên navdewletî. Le Monde Diplomatique kurdî yekem projeya navnetewî ye ku medya kurdî daxil dibe. Rayedar, rojnamevan û entelîjensa kurd ger li vê projeyê xwedî derkeve wê ev yek ji bo kurdan bibe ezmûneke girîng ku karibin tevlî projeyên din jî bibin û biserkevin.''
Zimanên ku Le Monde Diplomatique pê tê weşandin.
Le Monde Diplomatique bi van zimanan weşanê dike: Afrîkî, Erebî, Bûlxarî, Almanî, Çinî, İngilîzî, Esperanto, Farsî, Fînnî, Fransî, İtalî, Japonî, Koreyî, Kurdî, Xirwatî, Macarî, Norwecî, Polonî, Portekîzî, Rusî, Sirbî, Slowenî, Spanî, û Yûnanî.
Le Monde Diplomatique ji alî xwînerên frensî ve wek ’Le Dîplo' tê binavkirin. Le Mond Diplomatique giraniya xwe dide ser analîz û boçûnên siyaseta cîhanî û babetên kulturî. Le Mond Diplomatique cara yekem di sala 1954an de dest bi weşanê kir. Rêvebirê Giştî yê Le Monde Diplomatique ya fransî Serge Halimi û Edîtorê Giştî jî Maurice Lemoine ye.
Ji bo têkiliyê. [email protected]
