[center][b]“Kurdistan“ û Ingvar Karlsson[/b] [img]http://www.proxy247.com/index.php?q=aHR0cDovL2ltZzM2Mi5pbWFnZXNoYWNrLnVzL2ltZzM2Mi82MzUxL3BpcnR1a2FrdXJkaXN0YW54ZzkuanBn[/img] [img]http://img147.imageshack.us/img147/7706/mirhemyigitki6.jpg[/img][/center] Pirtûka dîplomatê Siwêdî Ingmar Karlsson di rojeva kurdan de ye. Bûye dabaşa nîqaş, meqale û semîneran. Çend hefte ne kurdên me li welatê nivîskarê kitêbê ketine qirik û pêxêra hev, di wateyeke erênî de helbet: Seroka Jinên Sosyal Demokrat, xanima navdar, keça kurd Nalîn Baksî û cardî keçeke kurd, debatora jîr Dilşa Demirbag, di bernameyeke radyoya Siwêd de dihev hilfiriyan û di çarçeweya azadiya mafê gotin û derbirînê de gotinên xwe gotin. Lêkolîner û siyasetmedarê salan, Mirad Ciwan bi riya hejmarek seminar nîqaş gurr kir, zewrek din lê xist. Rosa, bi meqalyeke pişta xwe dide çavdêriyên çend salên dawî ji semînerên birêz Karlsson, ragihandin û daxwiyaniyên wî, çeşneke din da guftûgoyan. Berpirsiyarê Zeratustra News ê, rojnamevanê çalak Gabar Çiyan jî, bi nûçe û analîzeke dirêj bi çend zimanan; kurdî, siwêdî û Ingilîzî jî di nav wan de, çarnikarên cîhanê bi bûyera Karlsson bi kitêbê hesand. Birêvebirê Radyoya Aştî li Stokhlomê Hecî Kardoxî jî ji cebhe û eniya xwe, teqsîrî nekir, nîqaş heta bi malên kurdan bir û dabaş gihande bi hezaran kes û malbat. Ev hişyarî, guhdîkî,haydariya ji çi dibe çi diqewime, kî ji bo me û welatê me çi dibêje, çi dinîvisîne, nîşan û delîla asteke berpirsiyariya di nav xwenda, rojnamevan, xwedîgotin, siyasetmedar, nvîskar û rewşenbîrên kurd de li diyasporayê ye. Xwiyaye,ew zemanê, kê ji bo kurdan çi digot ji wan re dima, li pey me dimîne. Kurd îro li ser xwe dixeyidin, li gel yan li dij xwiya nin, xwedîdeng, helwest û ray in. Nîqaşa li ser vê berhemê li ser pirtûka birêz Ingmar Karlsson “Kurdistan welatê ku tune“, vê dibêje. Ev xwiya dibe û tê dîtin. Reaksiyon çend core ne. Hinek bihêrs û hinek jî bi lez in, hewarî û mina nanê şikeva ne, li dora çend xalan diçin û tên. 1. Nave kitêbê 2. Pêşgotina kitêbê 3. Analîzkirina civaka kurdî , di nav vê analîzê de rexneyên li Mam Celal û Serokê Herêma Kurdistan Kak Mesûd Berzanî 4. Rexneyên li PKK 5. Alîgiriya hikûmeta AKP 6. Û dawî jî encama kitêbê ku“dewleteke kurdî xeyal e“. Di berhema birêz Karlsson de aliyên wuha ku di awura ewil de xwendevanê kurd dicefilînin, vediciniqînîn ne kêm in helbet. Belê kitêb ne tenê ev e. Kitêb xwendineke bisebir, li ser xwe, û dinavdenoqbûyî dixwaze. Yana dîtin û nirxandin wê sererû, vêl bimînin. Wê dualî bibin neheqî, hem li nivîskar û hem jî li xwendevanan. Faktorekî pêwist ji bo analîzek baş, biked û bikêr: Nivîskarê kitêbê diplomat e. Zincîrek sal li Rojhilata Navîn, li Ewropa û derên din dane pey xwe. Hê jî balyozê Siwêd li Tirkiyê ye. Ne nivîskar, rojhilatnas, rojnamevan yan jî gerok û niwênerê rêxistineke sivîl e. Diplomatek jî, ji herkesî zêdetir niwênerê dewleta xwe ye û bêgoman xeleka nav dewleta xwe û ya lê erkdar e. Birêz Karlsson hê aktîv e, li ser karê xwe ye û teqawîd jî nebûye. Kitêba dîplomatekî wuha binîvisîne û ew jî li ser mesela kurd, ku ji herkesî jî zêdetir ew baştir zane bê çendî bivê ye, hem karekî bi cesaret e û hem jî gotin û formûlasyonên biihtiyat û nişmî dixwaze.Tiştê Karlsson jî kiriye ev e. Di kategoriya xwe de, ango wek analîzeka dîplomatekî heta tu bêjî bes fikirlêkirî û konsekvent e. Diyare, Birêz Karlsson Rojhilata Navîn; gel,kultur, ol û mezhebên wê, nakokî, dijberî û pirsgirêkên wê baş nas dike. Di analîzên wî de aliyên xwurt û biîsabet ku em jî Karin îmzeya xwe bavêjin binê wan hene. Aliyên mirov difikirînin, rewşenbîr, dîroknas û siyasetmedarên kurd ji wan ders û encaman derxînin û ji bo xwe wek rexneyên ciddî qebûl bikin jî ne kêm in. Dîplomatê siwêdî ji doh ber bi îro de dikeve rê, ji analîza doh û îro ji bo siberojê encaman rêz dike û çareseriya xwe di du hevokên dawî de wuha bi laş û gewd dike ku yek ji wan peyveke pêşiyên kurdan e: 1. “Dewleta kurdî xeyal e“ 2. “Xwedê deriyekî digre, belê hezarî vedike.“ Em li meselê çawa dinerin? 1. Ya ewil birêz Karlsson Pirsgirêkên navxweyî, dîrokî û girêdayê heyam û serdemên diyar, pirr ji xwe mestir kirine. 2. Ya duhem wek ku ev pirsgirêk; em bêjin pirsgirêkên zarava, avabûna zimanê standart û yekgirtî, yekîtiya neteweyî, meselên kesayetî û serokayetiyan, nakokî û dijberiyên sosyolojîk, welatê Karlsson Siwêd jî di nav de, li tu derên din yên cîhanê çênebûbin, derneketibin û mina ku bi tenê karekter û xwezayeke kurdan bin, kurt û kin wek ku ne qonaxî , katî, belê di xulqeta kurdan de mayinde û berdewam bin û tu têkiliyeke wan bi zeman re, bi asêgeha dewletên ku dagîrkeran ji kurdan re çêkirine, bi destên di qirika wan de tune be, encaman derdixe. 3. Ya sêhem di tarîfkirina aliyan; aliyên di nav şer de jî birêz Karlsson ji rastiyê dûr dikeve , aliyê wî yê diplomatane, serdestê objektîvîtiya wî dibe û kurdan _ em bi gotinên wî bêjin_ wek niwênerên civateke “arkaîk, emirmende, li derveyî zeman,rêlêgirên modernîzmê,hejên nav piyan û dewleta tirk jî wek niwênerê avakirina dewleteke modern û sekûler binav dike. Bi gotinin din mirov pêjin û bêhna hewedariyeke heşkere û mêzêneke dageryayî dike. 4. Ya din dil dixwest ku Karlssonê welatê Olof Palmêyê humanist û alîgirê mafê mirovan vê jî bibîne, bê ka çendî ev “ dewleta Modern“ û berdevkê wê yê îro AKP û serokê wê Erdogan, ji bo “arkaîzma“ ew rexne dike, kûrtir û tîrtir bibe, kurd ji nav dernekevin, di nav de bixeniqin“ çawa şerekî xwênawî dike, çawa xwîna law û keçên kurd û tirk bi erdê de ber dide, ji ber ku aştiyê dixwaze çawa tecrîda Ocalan di nav de dişidîne û di encamê de çawa milyaran berhewa dike. 5. Ev jî gerek bê gotin ku bervajê texmîn û analîzên Karlsson, ne sînorên di nav kurdan de mina berê asê ne, ne kurd wek doh ji hev re bêtifaq in û ne jî jiyana arkaîk û emirmende ewçendî xwurt û serdest e. Her wuha dewletên mezin û dagîrker jî wek berê wuha bi hesanî hew Karin kurdan li dijê hev bikar bînin û kurd bi xwe jî hew rê didin xwe bikaranîna Karlsson destnîşan dike. 6. Dawî, serokên kurdan jî ji her gav bitecrûbetir, çavekirîtir, dûrbîntir, neteweyîtir û kurdistanîtir in. Gelê Kurd jî îro çendî girêdayê serok û mezinên xwe ye ev ji salên dawî tê dîtin û ji bo vê jî nimûne ewçendî zehf bûne ku pêwist nake mirov gişan li vir rêz bike. Me dît di dema girtina Ocalan de çawa li çar aliyên Kurdistana dagîrkirî û li her cîhê kurd hene li cîhanê, çawa kurd rabûn ser xwe, daketin kolan û meydanan, xweşewitandin û em îro jî dibînin bê serokên gelê me li Başûr; Kak Mesûd û Mam Celal çendî kar dikin da ku careke din kurd nekevin nav şerê birakujiyê û neyin lîstika dewleta tirk. Kitêba birêz Ingmar Karlsson “ Kurdistan“ her kurd û di dereceya yekem de jî siyasetmedarên me, berpirsiyarên sazî û komeleyên me, pêwiste bi baldarî bixwînin. Di her beşê kitêbê de gelek tesbîtên xwurt, înformatîv hene ku em divê bi cidiyet li ber çavan bigrin. Mîrhem Yigit Li Nisêbînê hatiye dinyê. Jibo xwendina bilind derket derveyî welêt. Li Almanya û Çekoslovakyayê xwend. Di dezgehên pêşî yên kurdan li Ewropayê, di yekîtî, federayon û komeleyan de xebitî. Rêvebiriya radyoya Mezopotamyayê kir. Di destpêka derketina rojnameya Welat de xebatên wî piralî çêbû. Pirtûkek wî bi navê Helwest derketiye. Di gelek kovar û rojnameyan de nivîsên wî belav bûne. Niha, di Intîtuya Kurdî ji bo lêkolîn û Zanistiyê li Almanyayê aktîf dixebite. Endamê KNK ê ye. [b]Zarathustra News – eurokurd.net[/b]