Kerkûk: Jimara qurbaniyên bûyera trafîkê gehişte 26 kesan
Rûdaw.net - Kerkûk: Rêveberê Fermangeha Tendirûstî ya Kerkûkê Dr. Sidîq Heme Resûl, ragehand ku di bûyera trafîkê de ya li ser rêya Kerkûk-Dûbizê 26 kesan jiyana xwe ji dest daye û 9 kes jî birîndar in.
Derbarê bûyerê de Rêveberê Fermangeha Tendirûstî Dr. Sidîq Heme Resûl agahî dan Rûdawê û got: ‘’Vê sibê li ser rêya Kerkûk-Dûbizê minîbûsek û otomobîleke Mazda lihev ketin û di encam de 26 kesan jiyana xwe ji dest da û 9 kes jî birîndar bûn.’’
Îro destê sibehê minîbûseke Nîsan 30 neferî ku ji Bexda ber bi Dihokê dihat li nêzîkê gundê Bacwan ser rêya Kerkûk-Dûbizê ligel otomobîleke Mazda lihev ketin û di encam de gelek kesan jiyana xwe ji dest da û di nav wan de jin û zarok jî hene.
Li gor agahiyên peyamnêrê me li cihê bûyerê, tekelekî otomobîla Mazda teqiye û bûye sedem li minîbûsa 30 neferî bide, minîbûsê jî çend bîdonên benzînê danîbûn ser bagacê dema agir bi benzînê ketiye, bîdon teqiyane û piraniya kesên di nav minîbûsê de jî jiyana xwe ji dest dane.
Kesên di nav minîbûsê de hemû hevwelatiyên sivîl bûn û dixwestin bo seyranê ber bi Dihokê herin, kesên di nav Mazdayê de jî cilên pêşmerge li wan bûye û diçûn ser karê xwe, lê dema bûyer qewimiye şofêrê wan jiyana xwe ji dest dide û 4 kesên din jî birîndar bûne.
