ŞIMA RA LOMÊ MI ESTO

Lome, mabênê dost u nasan de, heval u ciranan de beno. Waxto ke mordem, çiyo ke zen nêkeno dost u nasi bıkerê,  a ca de heqa mordemiya ke lome bıkero. Mabênê dışmenan de lome nêbeno. . . Coka ke lome, çiyê de bı qimet o ke,  seba rındiye u hewliya dostan u nasan beno. Ebe vatê de bin; keso ke nêwazeno dost u nasi şaşiye u çewtiye bıkerê,  i lome kenê ke, dost u nasi na şaşiye de xo raxelesnê, reyna mekerê. Lome de wastena xırabiye, niyetê de 'qefçıl' çino. Sebır bıkerê ez lomê xo şima ra eşkere bıkeri...Tayê çi estê ke,  ma pêro ra lazım o, ê ma pêrune wo. Partiyê şıma,  ideoloji u fıkrê şıma, heskerdene u hêrsbiyena şıma,  tenya ê şıma wo. Kam çı ra, kameji çi ra hes keno bıkero, heqa ina wa. Hama welat,  zon,  kamiye ê ma pêro wo, ma pêro ra lazım o. Wayirê êy çiyê hêjayi ma be xoyi me. Zon,  'malê fılankesi' niyo... Zon rengê kamiya ma wa ke, dewleta Tırki wazena,  seran be seran bıqedêno. Seba naye, hêyştay sere de zêde wo ke, çı dest de ame kerd u keno. No seba mordemiye çiyê de zaf qefçıl u şermê de gırano. Dewlete Tırki,  ne 'şerm' zaneno,  ne mordemiye... Ma şıma nêvanê dewê ma, kêyan u şukanê ma qey vêşnenê, qey ma kışenê? Dewleta Tırki, ne naye de şerm keno,  ne 'çetan' u qefçıliya xo de... Çı hêfo ke ma hina bınê tesirê vayê rojev u rojnameyê dewletaTırkan de nêxelesiyayime ra. İ ebe xo vırazenê, nusnenê, dıme ra ma nusnenime, qesi kenime. Ma hina beşe nêkenime rojeva xo vırazıme. Bê şık, ma ebe no hal, 'cêr de hata cor' ebe zonê Tırki pê kar anime. Seba zonê xo, sarê xo tayê nêdajnenıme, bêçıka xo nêlewnenime'. Şıma ra lomê mı esto, gelê dost u nasi, wayi u bırayi, heval u cirani... 'Gewendê şari', zaf kay kerde serê zonê ma de. İnan,  rasiya ma, kamiya ma,  ma de zaf kerdê duri. Ruhê ma de zonê ma zaf vet,  zonê xoyê asimileyi kerd zere u fekê ma... Her zon reng o,  weş o, naye mı ra medê vatene ez rınd zanena. Hama zonê Tırki seba qedênayena ma kar keno. Na dınyayê ewroyi de,  bê zonê Tırki,  zonê de bin çino ke, seba zonanê şari, bıbo sebebê asimilasyoni. Rêyna na dınya de, zonê de zê zonê tırki çino ke seba qedênayena zonê ma pê kar bıkero. Şıma lomê mı fam kerd?Waxto ke dost u hevali lome bıkerê, dıme ra ke lome qediya, persênê vanê; De keremke vace,  ez lomê xo de neheqa?Hata nıka ez rast niyama ke, ju kes lomê dost u hevalê xo ra vaco; 'Tı lomê xo de neheqa'. Zêde mı niya heşêna;-'Lomê to sare u çımanê mı ser'-'Tı lomê xo de neheq niya 'Nıka ez nêvana 'lomê mı sare u çımanê şıma ser', Ez tenya naye wazena pers bıkeri şıma ra; Ez lomê xo de neheqa. . . ?Rast ez lomê xo de neheqa. . . ?Kerem bıkerê,  vate u qesa ê şıma wo...İlhami Sertkaya16-6-2006