EZ (2)

Waranê duri de, kıla adıranê şuyanan de ama ez.Tarıqa serubın biyene de suziya ama.Zerê mıde, rêça derbanê serran esto. İ emrê ke xem u xeribiye de, xezeb u hesretan de derbaz biye u mendê; Ez a. Kıtabê ke salıxê hesretanê ma tede rê, hina niyamê nusnayene.Bılurvani hina beşe nêkene rengê lorika ma vecêne. Reng u vengê ma bınê paniyanê inkaran de rê.A ye ra wa ke, her kes nêwazeno ma bıheşêno.Ez Memed karasungur; Karêr de ebe aspariye kewta rayan, heqibê mı de emanetê serbestiye bi.Mı sindoran nas nêkerd, zalıman ra vıle çewt nêkerd.Mı astorê xo kerd bi zerê xo. Ez Haydar Karasungur; Ebe sarebeziye u camêrdiye verba dışmenan de vıneta.Dışmeni qat be qat mı de zêde bi, gulê mın qediya u seba ke ez mekuyi destê dışmenan, mı canê xo de bombe teqna.Ez ju azebe kareriya; Namê mı 'gerilawa Şirnıje' bi.Dewa Şirnan ra wa.Fistanê mı de, serbestiye ebe hazar reng amebi neqış kerdene. Bêçıka mı de nuştanê serbestiye bi.Porê mı,vayanê neqebanê welatê mı mıştı dêne.Mı hewnan u şewanê tari, ebe lınganê xo pan kerdêne.Terso ke dışmeni kerd bi zerê mı, ebe sewda welatê xo inan kınıt u est, kerde zerê dışmenê ma.Ez hardlercê Gımgımi ra veciya ama; Mı kıfır u xezebê Tırkan heşêno, derba sed serran belengaziya mı de ro.Seri derbaz biyê, destê mı de rêça pelaxiya koyan, domanê mı verba duritiye şi u niyamê hina.Çımê mı rayan de,cendekê mı mergan u neqeban de mendo,ez ama kıştene u meyitê mı verg u heşan ra mend bi. Ez Sebri Kızılkan; Şuka Çewlıgi de, gewendi goniweri u xulamê Tırkan, şewê de zımıstani muj u duman de erciyayi serê mı.Mabênê lulanê çekan de,mı Çewlıg de vısnayi.Zê her bêbextiye reyna tari bi waxt.Ebe wesayit o ke rêça goniya domanê welatê mı te debi,ama kaş kerdene ez. Zerê wesayiti de, mabênê barbar u zalıman de,dolıma pêyêne mı qaytê şuka Çewlıgi kerdêne.Fek u destê mın gırêdaye bi.Ez qira, şıma nêheşêna.Vengê wesayiti de, lorika mayanê Karêri amêne.Karêr, verê çımanê mı de, zê ju xanıma bêçariye, berbêne.Çewlıg,a şewa tariye de, zê ju lacek o sewi bi, maya xo ra gêrêne.Serxulmendayê Anqara de, zalım u barbari televizyon u rojnaman de qalê 'huquq u moedemiye'! kerdêne.Ez bı jihatiye celadanê xo de da pêro.Çı hêfo ke destê mı gırêdayê,cendekê mı bınê çekan de bi.Ama kıştene u bınê ju pırdê deşta Muşi de erciya vare.Biya cemed heliya.Meyitê mı de,mabênê bêçıkanê mı de,letê porê zalıman bi.O por, nişanê camerdiya mı u nişanê bêşerefiya inan bi.Ez Metin Yurtsever;Çımê mı de, rengê astêrekan amêne wendene.Roştiya zerê mı, taritiya neheqan u neheqiye dırnêne. Mı şukan de vengê zerbelekiye, şewan de roştiya dawa serbestiye vıla kedêne.Coka ke bêbextiye u namerdiye, mı de zaf tersêne.Wastena mı, wastena şarê mı bi.Waxto ke şıma hewnde bi, ez u bêbextiye u bêbextan, bêvengiya qoridoran de herb de bi me.Mabênê dêsan de,bınê hesın u qamçiyan de biya ez.Zalımi mı de qat be qat zêde bi.Serxulmendayê şuka İzmiti de, baya qetıl kerdena ma amêne.Ma ke,seba mordemiye,seba hastiye verba zalıman de sarê ma berz, zere zelali me.Ma ke zaf amêyme kıştene, zaf rastê jan u jariye bi me.Ma ke wayiranê a roştiye u sebestiya ke bınê bandora zalıman de rê u ma dızdê a roştiyeyi me.Ma ke Prometheyi me, Zeus'ê Tırkan de adır tırenime.Ma ke domanê welatê mayê bınê bandora dewleta Tırkani me.Ma ke seba na roştiye, seba kamiya xo zaf leçe kerdime, koyan de,şukan de duritiye de,rayan de,bırran de, zindanan de, ebe koniya xo namê xo nusnayi me.Mı namê wastena zerbeleke, çend şewan verba zalıman, i qoridoran de nusna.Bıwanê....Meberbê kênekê welatê mı, meberbê Duygu, Diba meberbê....Çıma zê hezaran, domanê şehidê ma yê.....naye rınd bızanê ke, no zılım u i kerdeni, zalıman ra nêamnenê.Ez şu şara a ke wayirê dışmenê de zaf bêbextiya.Mı ra vate u qesanê bêbınan u teoriyanê çirok u şanıkan mevacê.Mı ra ebe na bandoriye,ebe na zalımiye,ebe na dırutiye qalê 'Emperyalizmi, Latin Ameriqayi, Enternayonalizmi' mekerê.Her çi verba iıman de ro.Hata ke şıma kamiya mı nas nêkerd, zon u tarıqa mı,kultur u edebiyatê mı ra tehamul nêkerd, hata ke şima serbestiya qederê mı qrbul nêkerd,'entelektuelan u zanayanê'! xo bancêne na zurekeriye de, çı ke ma endi zuranê şıma de bêzar bi me.Kay mekerê ebe ma.......Ma zaf bedel da verba deq u dolbanê şıma......Vêrd ra waxtê qam kerdene....Ez ju şar a ke, ebe niyetê xoyê zelal u pakiye, mı şıma 'mordem' zen kerd bi zaf ver de..Bedelê ni niyetê xo, ebe zılmê şıma, ma qetıl kerdene, kıştene,vêşnayene, rışnayene zaf da, endi bes o...!Ez ju pêyayê welatê xo wa ke, deq u dolaban u vate u qesanê zurekeriye de 'huquq-muquqê' şıma rınd zanena, rınd fam kena.Ez coka, o pêya wo ke,'çep-rast,cêr-cor,kışte-zere-tewer'an rınd fam kena u goş nêdana qesa 'qaşo entelektulan u zaneyan 'ê ke qalê pers u çareseriya mı nê, qalê 'ekolıjik, biyolojik, globalizm, emperyalizmi' kenê...Ez baweriya çıman u diyena xo,baweriya rastiya zelale kena.Coka ke zê dawa serbestiye u çareseriye, namê mı zelal o Ma şıma kam ê.... İlhami Sertkaya.20-2-2006