EZ (1)

Ez Dêrsım de Şêuşên o ke namê xo veciyo 'Bom u budala', nitırbanê xo şuka Dêrsımi de amo vıraştene wa.Her roj u dem, qaytê 'baqılan' kena u 'baqılê' ke weşiya mı de mı fam nêkerdê, merdana mı de ebe i 'aqılê xo' reyna qaytê mı kenê ke dênê 'bêfamiya xo' bıdêne.Ez koyan u xırabanê Karêri de Qeremamud,waxto ke dewa Pircanan de kewta rayan u vayan, mınneta mı wayirê 'non u rısqan' ra çini bi.Mı rısqê xo, neqeban u zımanê xoriya welati de, ebe dest u hermanê xo vetêne.İ kesê ke seba letê de dar u ber, seba 'zıl u gıl' dêne jumıni ra, mı ra vatêne 'xêx'.Ne seba bax u bostani zerê kesi şıkıt mı, ne awe bırna serê hêgan de. İ kesê ke mı ra vatêne 'xêx', resmê inan nê, resmê mı nıka dês u defteranê şıma de rê. Ez ne biya 'wezir' ne biya 'rezil'. Ebe rastiya xo,ebe zon u kamiya xo ke gêrêne, reyna i kesê ke rastiye u kamiya xo de amê vısnayene,ebe zonê asimilasyoni(Tırki) qaytê mı kedêne vatêne; -Wii Qaramamud 'amca sendır'..? -Nê nê ma tı çıman ra kora qa 'bendır'. Ez,şukan u dewanê welatê xo de, ebe cendırme u polisanê Tırkan ancina zindan u qulxanan vêşan,têşan u heqeratanê bê edebiye vênena.Ez Çewlıg de dengbêj Eziz, roştiya çımê mı çini bi,mı ebe roştiya zerê xo zafine de zêde dınya diyêne u ebe zerê xo, zonê xo de kılaman watêne.Kılamê mı, nıka zê axu verba inkaran de vındenê.Şewê de tari,ez cayê de ama tan dayene,biya helm u cemed, heliya. Ez dılopanê hêstırê dayikan de, ebe xezeb u kesır gılêr bena.Rêça mı, sewda zerê gerilan de, ko be ko,ebe rêça kılamanê serbestiye kewtê tê miyan.Her usar,çemê Munzuri de gul u çiçeganê newan ra nermiya xo kerem kena. Ez Husên Morsumbul, şukan u kolonan de,dewan u hêgan de, nêzdi u duriyan de mı ra megêrê.Mı pers mekerê welatan u sindoran de.Ez şewê de tari, waxto ke şıma zeleqiya bi tersanê xo,pê perdan u keweran de bê hewn u bêveng mendêne,mabênê eskeranê Tırkan de,verba çemê Muradi ama kaş kerdene.A ca de ra...Xoritiya çemê Muradi de,erciya verê masuyan.Porê mı de,baya deşta dewa İbrahiman amêne,destê mı, lete lete bi zê şuka Çewlıgi.Sênê mı de, derd u xemanê karêri ame bi neqiş kerdêne. Ez ju kêneka şeş seriya,ebe top u tufangan ama qetıl kerdene, bırayê mı erciya adıran.Nıka ez u bırayê xo,ma bê mezeli me, ma ra megêrê, şıma cendekê ma nêvênenê.Serê vindikerdena ma de,seri derbaz bi,qonvoyê eskeranê tırkan derbaz bi serê sênê ma de. Ez derê Laçi'ya Dêrsım de, koyo sıpi'ya Çewlıg de...Vengê welati zindanan de qira, meydanê xarpıti de ebe namê şarê xo sareberziye neqışna verba dışmenan de.Ez seyid Rıza wa, mı ebe pina xo da kursiyê ixdami ra. Ez Husên şen, rayanê welatê ma de aqılê bandoranê Tırkan kerd tê miyan,çımanê inan de ecêbiye gırs kerd.Mabênê hacetê janan de,duşta dışmenê ke qat bı qat zêde bi,ebe sareberziye mı leçe kerd.Canê xo seba welatê xo da,sırê xo nêda. Sırê mı de vengê kılamanê serbestiye amêne. Ez ju gerila wa.Vêşan,têşan manena,serdan de 'derdan de' manena,bêhuquq u bê neheqiye nêmanena,qebul nêkena.Ez ju roştibira, çirokan u teoriyanê zurekeriye u dı rutiye kena bınê lınganê xo, hile u sextekariya 'amir u memuranê' tırkan, 'leqa bıratiya' ke serê inkarê ma de kay kenê, kayanê inan kena 'xenimê' inan, tepya çarnena. Ez zaza wa, kurd a,kırmanc a goran a, soran a hama ez Tırk niya, çirokanê 'enternasyonalizman' mı ra mevaco kes,kam ke wazeno 'bırayê ma bo', kam ke hastiye u demoqrasiye ra hes keno,kam ke qalê mordemiye,qalê heq ,huquq u têduştiye keno, wa verde zon u kamiya ma ra,welat u edebiyat'ê ma ra, tarıqe u rastiya ma ra tehamul bıke ro.Bê na rastiye, her çi zur o, qılêr u qefçıl o. Ez ju welat a ke, hina namê xo qedexe wo,beno sebebê zindan u cezan.Ez ju welata ke, gewendê tırkan kewtê hardê mı, namê neqeban, koyan şukan, dewan, zıman,verojan, timukan u mezranê mı vurnê, qedexe kerdê.Ebe milyonan şehidê mı sênê mı de hewn de rê.Ebe milyonan 'domanê mı' vıla biyê, xeribiye de rê, kaş u kuçanê şukan u welatanê xeriban de macir ê. Kam zaneno ke, çend dolımi serê sênê mı de,hêgan u koyanê mı de, dewan u bıranê mı de bombanê kimyayi ame eştene? Xemê kamiyo ke, derguş u domanê mı erciya verê adıranê top u tıfangan? Rast xemê kamiyo...? wayirê i kerdenanê zılıman, hina ma ra qalê 'bıratiye u huquqi'! kenê, ma şıma ra se biyo gelê tayê 'roştibirê mı'!İ yê ke hina na rastiya ma nêşıkinê bıvênê, hama 'rastiya'! dınya aleme rew vênenê...İ yê ke ordiyê ke dewan u şukanê ma vêşnenê,'nêvênen'e'! welatanê duri de, bêçıka ju kesi ke deja vênenê.... Ez, a ye ra ke ju pêyayê welatê xo wa, heni qaytê dınya u halê ma kena, gege ecêb manena...... Ma şıma kam ê...? İlhami sertkaya  12-2-2006