Duhî êvarê sekreterê giştî yê YNK'ê Mam Celal li binaya Kulturê ya li bajarê Silêmaniyê digel hezaran kesên hewramî civiya ku ji çendîn kesayetî,çîn û pêkhateyên hewramî pêk hatibûn. Çend kesayetiyên navdar bi cihê gotar pêşkeş kirin û soz dan dê deng bi Lîsteya Kurdistanî û Mesûd Barzanî bidin.
Di civînê de kesayetên navdar ên hewramî Cemîl Hewramî,Şêx Ebdulmelîk Neqşîbendî,D. Tahîr Hewramî, lîva Aram Se'dî û berêveberê nahiyeya Biyareyê jî amadebûn.
Mam Celal di civînê de gotarek pêşkeş kir û got:“ Em dixwazin ji bo Hewraman pir tiştî bikin, bo nimûne em difikirin li Biyareyê nexweşxaneyekê çêkin û navçeyeke tûrîstîk ya baş li Hewraman ava bikin.“
Mam Celal got:“ Me bawerî bi demokrasî, azadî û bîr û baweriya cida heye, me ji bo rizgarkirina Kurdistanê bi rûbar xwîn rijtiye, me pişta xwe bi meşrûyeta şoreşgêrane nebest ku bêjin ji ber ku me xwîn rijtiye û şehîd daye,şoreş kiriye û vê rojê aniyê holê , heqê me ye ku em hukimraniyê bikin, belkî me pişt bi xelkê Kurdistanê bestiye ku xelkê Kurdistanê bi azadî nûnerên xwe yên bo parlamentoya Kurdistanê hilbijêre û ew parlamento jî hikûmeteke li gor dilê xelk hilbijêre daku xizmeta xelkê bike. Hêvîdar im wek li we tê çavêrêkirin, li roja hilbijartinan deng bidin û tikaya me jî ew e dengên xwe bidin cenabê kek Mesûd û Lîsteya Kurdistanî.“
Di beşeke din a gotara xwe de got:“ Cihê matmayînê ye ku hin kes pê nexweş be ku PDK û YNK'ê bi hev re bin û hevxebat bin û yek lîste hebin ji bo hilbijartinên li Kurdistanê,kesê ku dilsozê kurd û Kurdistanê bin divê ji vê yekê dilxweş be. Ev birayetî û aramî di berjewendiya herkesî de ye.“
Serok Talebanî wiha dom kir:“ Çima cenabê kek Mesûd? Rast e kak Mesûd zarokê serkirdeyekî me yê mezin e,rast e kek Mesûd ji malbata Barzan e ku yekek in ji şêxên terîqeta neqşîbendî, rast e kek Mesûd zarokê Barzan e ku di çend salên borî de dihan car şewitiye ,hatiye wêran kirin û hezaran şehîd daye lê ne ku tenê ji ber van sedeman divê em dengê xwe bidin Lîsteya Kurdistanî û Mesûd Barzanî,belkî ji ber wê çendê ye jî ku kesekî bihêz û karîn e û dikare serokatiya herêmê bike, ji zaroktiya xwe pêşmerge ye û li Iraq,Kurdistan,Rojhilat,Ewropa,Amerîka û Asyayê kesekî navdar û naskirî ye, lewra divê em hemû dengê xwe bidin Mesûd Barzanî bidin.“
PUKmedia
